Gesels Goedkoper
If you're new here, you may want to subscribe to my RSS feed. Thanks for visiting!
HOE kommunikeer jy deesdae? Maak jy nog so gereeld oproepe soos voorheen?
Ek het die afgelope ruk besef ek raak effens geïrriteerd met aanhoudende oproepe. Ek luister lankal nie meer na my stemposboodskappe nie en voel deesdae gemakliker om per e-pos, SMS of een van die ander boodskapprogramme op my selfoon te kommunikeer.
Ek verkies natuurlik om deesdae van What’s App gebruik te maak. Indien jy dit nog nie op jou selfoon geïnstalleer het nie, gaan kyk sommer dadelik of dit met jou selfoon versoenbaar is en indien dit is, sal die program jou baie geld spaar. Dit werk net soos ’n SMS maar met baie minder koste. Dit gebruik ook jou telefoon se nommerdatabasis, so jy sal nie nodig hê om vriende se pinkodes of ander kodes in te tik nie. Indien hulle ook die program het, sal jy hulle in die program gelys sien.
Die groot voordeel van die programme is jy steur mense nie. Indien ek ’n boodskap ontvang, kan ek besluit of ek dit dadelik wil lees en wanneer ek dan op die boodskap wil reageer, kan ek tot besluit ek wil die boodskap heeltemal ignoreer. Indien ek ’n oproep ontvang, moet ek dadelik alles los en aandag gee aan die een wat my bel.
Ons lewe in ’n wêreld waarin ons elke dag groot uitdagings aandurf en indien ons vir elke oproep alles moet los, sal ons nêrens kom nie.
Is dit nie tyd dat jy jou onderneming aanpasbaar maak vir navrae wat nie telefonies plaasvind nie? Wanneer het jy ’n SMS-navraag vir jou onderneming ontvang en gereageer? Is dit nie tyd nie?
Dit kan so maklik gedoen word.
